ລາວ ຕິດອັນດັບປະເທດທີ່ໜ້າທ່ອງທ່ຽວທີ່ສຸດ ປີ2023 ໜຶ່ງດຽວໃນ ອາຊຽນ
ວາລະສານ National Geographic ຂອງອັງກິດ ເຊິ່ງເປັນໜຶ່ງໃນວາລະສານທີ່ມີຄົນອ່ານ ແລະ ໜ້າເຊື່ອຖືຫຼາຍທີ່ສຸດໃນໂລກ, ໄດ້ຄັດເລືອກປະເທດລາວເປັນ 1 ໃນ 25 ປະເທດ ທີ່ມີ ສະຖານທີ່ທ່ອງທ່ຽວທີ່ໜ້າຕື່ນຕາຕື່ນໃຈທີ່ສຸດທີ່ຄວນໄປທ່ອງທ່ຽວໃນປີ 2023.
ປັດໄຈຫຼັກທີ່ເຮັດໃຫ້ປະເທດລາວ ເປັນປະເທດໜຶ່ງດຽວໃນອາຊຽນທີ່ຕິດອັນດັບໃນ ‘ບັນຊີລາຍຊື່ເປັນຈຸດໜາຍປາຍທາງສຸດຍອດປະຈໍາປີ’ ຍ້ອນ ມີການທ່ອງທ່ຽວແບບອະນຸລັກ ທີ່ສົ່ງຜົນປະໂຫຍດໃຫ້ຊຸມຊົນ, ເປັນປະເທດທີ່ເຂົ້າເຖິງໄດ້ ເນື່ອງຈາກມີລົດໄຟລາວ-ຈີນ
ເຖິງວ່າຈະເປັນປະເທດທີ່ບໍ່ມີທາງອອກສູ່ທະເລ ແຕ່ກໍເປັນປະເທດທີ່ເຂົ້າເຖິງໄດ້ງ່າຍ, ເປັນຈຸດໝາຍປາຍທາງດ້ານການຊີມອາຫານ ເພາະເປັນອາຫານທີ່ຫຼາກຫຼາຍ ແລະ ສົດໃໝ່, ມີກິ່ນອາຍວັດທະນະທຳຂອງຕ່າງຊາດ ຫຼໍ່ຫຼອມລວມເຂົ້າຢ່າງກົມກືນ ແລະ ທີ່ສຳຄັນ ການທ່ອງທ່ຽວແບບຊຸມຊົນທີ່ຍືນຍົງ ເຊິ່ງກົງກັບຫົວຂໍ້ຂອງການຈັດອັນດັບ ‘ຊຸມຊົນ’ ບ່ອນທີ່ມີການອະນຸລັກ.
ວາລະສານດັ່ງກ່າວ ຄົ້ນຄ້ວາການທ່ອງທ່ຽວໃນປະເທດລາວ ໂດຍຜ່ານຄູ່ມືການທ່ອງທ່ຽວລາວຢູ່ໃນເວັບໄຊ ທ່ອງທ່ຽວລາວ ທີ່ ແນະນໍາປະເທດລາວແລະ ສະຖານທີ່ທ່ອງທ່ຽວຈໍານວນຫລາຍຂອງຕົນໃຫ້ແກ່ຜູ້ອ່ານແລະນັກທ່ອງທ່ຽວ.
“ລາວເປັນປະເທດທີ່ບໍ່ມີທາງອອກສູ່ທະເລຂອງອາຊີຕາເວັນອອກສ່ຽງໃຕ້, ກົງກັນຂ້າມ ຊີວິດພັດໝູນວຽນຕິດພັນກັບແມ່ນ້ຳລຳເຊ. ຕາມລວງຍາວຂອງປະເທດ ທີ່ມີພູ ດອຍຕົ້ນຕໍ ມີແມ່ນ້ຳຂອງໄຫຼຜ່ານ ເອື້ອອຳນວຍຕໍ່ການເຮັດນາ, ເຮັດສວນ, ລ້ຽງສັດ ຂອງປະຊາຊົນ ແລະ ມີແມ່ນ້ຳເປັນບ່ອນຢູ່ອາໄສຂອງປາທີ່ສຳຄັນ ແລະເປັນແຫຼ່ງນ້ໍາຫຼັກຂອງປະເທດ.
ໝູ່ບ້ານທີ່ຕັ້ງຢູ່ລຽບຕາມແມ່ນ້ຳ ເປັນເຈົ້າພາບຈັດໃຫ້ນັກເດີນທາງກັບຄືນໄປທ່ຽວຊົມສະຖາປັດຕະຍະກຳອານານິຄົມຝຣັ່ງ, ພະລາຊະວັງ ແລະວັດວາອາຮາມທີ່ງົດງາມ, ພູມສັນຖານທີ່ໂດດເດັ່ນເຮັດໃຫ້ປະເທດລາວມີຄວາມຜາສຸກຈາກເສັ້ນທາງທ່ອງທ່ຽວທົ່ວໄປ” ວາລະສານNational Geographic ກ່າວ.
ປີນີ້ ລາວມີນັກທ່ອງທ່ຽວຫຼາຍກວ່າ 1 ລ້ານຄົນ, ໃນນັ້ນມີນັກທ່ອງທ່ຽວຕ່າງປະເທດ 644,756 ຄົນ. ລັດຖະບານຄາດວ່າຈະດຶງດູດນັກທ່ອງທ່ຽວຕ່າງປະເທດໃຫ້ໄດ້ 900.000 ຄົນໃນປີ 2022, ເຊິ່ງສາມາດສ້າງລາຍຮັບໄດ້ກວ່າ 218 ລ້ານ USD.
ພາບປະກອບງາມໆຈາກ:
wanderalao/Topwstrip
