ຈັບແກ້ງ ລັກເຫລັກລາງລົດໄຟ 9 ຄົນ.

ຈັບແກ້ງ ລັກເຫລັກລາງລົດໄຟ 9 ຄົນ.

………
ໃນເດືອນມິຖຸນາ 2022 ຜ່ານມາ, ປກສ ເມືອງໄຊເສດຖາ ນະຄອນຫຼວງວຽງຈັນ ລົງແກ້ໄຂ ແລະ ມ້າງກຸ່ມແກ້ງລັກເຫຼັກລາງລົດໄຟໄປດໍາເນີນຄະດີ ແລະ ໃນນັ້ນ ສາມາດຈັບຕົວພວກຖືກຫາໄດ້ 9 ຄົນ.

ເຈົ້າໜ້າທີ່ ໃຫ້ຂໍ້ມູນວ່າ: ຜູ້ຖືກຫາ ຊື່ທ້າວ ທ້າວ ຍັນ ອາຍຸ 22 ປີ, ທ້າວ ບຸນມີ ຫຼື ແຫຼ້ ອາຍຸ 36 ປີ, ທ້າວ ບຸນເຖີງ ຫຼື ນາຍ ອາຍຸ 40 ປີ, ທ້າວ ບຸນທະວີ ຫຼື ແຂກ ອາຍຸ 31 ປີ, ທ້າວ ທອງດໍາ ຫຼື ດໍາ ອາຍຸ 31 ປີ, ທ້າວ ຝອດ ອາຍຸ 16 ປີ ແລະ ທ້າວ ສົມຄິດ ຫຼື ຈີນ ອາຍຸ 31 ປີ ທັງ 7 ຄົນຢູ່ບ້ານນາຄວາຍໃຕ້ ເມືອງໄຊເສດຖາ ໃນເບື້້ອງຕົ້ນພວກກ່ຽວ ໄດ້ພາກັນເຄື່ອນໄຫວເສບຢາບ້າ ແລະ ຍັງໄດ້ຮ່ວມກັນເຄື່ອນໄຫວລັກເຫຼັກລາງລົດໄຟ.

ໃນລະຫວ່າງເດືອນພຶດສະພາ ຫາເດືອນມິຖຸນາ ໄດ້ພາກັນໄປລັກເຫຼັກຢູ່ແຄ້ມກໍາມະກອນເຮັດທາງລົດໄຟເຂດບ້ານນາຄວາຍໃຕ້ ເຊິ່ງເປັນເຫຼັກເສັ້ນປ້ອງອ້ອຍຄວາມຍາວປະມານ 20 ຊັງຕີແມັດ ຫາ 1 ແມັດ ທີ່ຕັດກອງໄວ້ເພື່ອນໍາໄປເຮັດລາງລົດໄຟ ຈໍານວນ 16 ຄັ້ງ ໄດ້ເຫຼັກເສັ້ນນໍ້າໜັກ 664 ກິໂລກຼາມ ຂາຍໄດ້ 3.320.000 ກີບ; ໄດ້ໄປລັກເຫຼັກຝາປົກຄອງນໍ້າເສຍຢູ່ສາງປູນ ຍາວປະມານ 1 ແມັດ ຢູ່ເຂດບ້ານນາຄວາຍໃຕ້ຈໍານວນ 3 ຄັ້ງ ໄດ້ເຫຼັກນໍ້າໜັກ 150 ກິໂລກກຼາມ ຂາຍໄດ້ເງິນ 750.000 ກີບ ແລະ ໄປລັກທຸບຝາອັດທໍ່ນໍ້າຢູ່ເຂດວັດນາຖົງ ບ້ານນາຄວາຍໃຕ້ ຈໍານວນ 8 ຄັ້ງ ໄດ້ເຫຼັກນໍ້າໜັກ 505 ກິໂລກຼາມ ຂາຍໄດ້ເງິນ 2.000.000 ກີບ ເຊິ່ງພາຍຫຼັງທີ່ລັກໄດ້ແລ້ວກໍນໍາໄປຂາຍໃຫ້ຮ້ານຮັບຊື້-ຂາຍເຫຼັກຂອງທ້າວ ຫຼ້າ ບ້ານໄຮ່ຄໍາ ແລະ ຂາຍໃຫ້ຮ້ານຂອງຄົນຫວຽດນາມ.

ສ່ວນທ້າວ ແຈັກ ອາຍຸ 22 ປີ ແລະ ທ້າວ ອາລີ ຫຼື ລຽນ ອາຍຸ 23 ປີ ພັກເຊົາຢູ່ບ້ານດົງໂພສີ ເມືອງຫາດຊາຍຟອງ ສາລະພາບວ່າ: ໃນເດືອນເມສາ 2022 ໄດ້ພາກັນໄປເຮັດວຽກກຳມະກອນກໍ່ສ້າງທາງລົດໄຟຢູ່ເຂດບ້ານ ດົງໂພສີ ໂດຍໄດ້ຄ່າຈ້າງມື້ລະ 80.000ກີບ ມາຮອດວັນທີ19 ມິຖຸນາ ເວລາ 19:00 ໂມງ ໄດ້ມີທ້າວຊົ່ງຢາງ ເຄີຍເຮັດວຽກກຳມະກອນກໍ່ສ້າງນຳກັນມາຫາ ຢູ່ຫ້ອງແຖວ ຫຼັງຈາກນັ້ນ ກໍໄດ້ບອກໃຫ້ໄປເອົາເຫຼັກລາງລົດໄຟທີ່ຊຸກຊຸກເຊື່ອງໄວ້ເຂດບ້ານນາຄວາຍໃຕ້ ໄປຂາຍເອົາເງິນມາແບ່ງປັນກັນໃຊ້ຈ່າຍ; ຕໍ່ມາຈຶ່ງຕິດຕໍ່ຫາທ້າວ ອາລີ ມາຫາຢູ່ຫ້ອງແຖວ ແລະ ພາກັນຂີ່ລົດຈັກຊ້ອນກັນໄປເອົາເຫຼັກລາງລົດໄຟຈຳນວນ 14 ອັນ ທີ່ຊຸກເຊື່ອງໄວ້ ແລະແຕ່ລະອັນມີຄວາມຍາວ 80 ຊັງຕີແມັດ ນໍ້າໜັກປະມານ 18 ກິໂລກຼາມຕໍ່ອັນ.

ຫຼັງຈາກນັ້ນ, ຈຶ່ງພາກັນເອົາເຫຼັກລາງລົດໄຟ 6 ອັນຂຶ້ນໃສ່ລົດຈັກ ພໍຂັບຂີ່ລົດຈັກຮອດເຂດບ້ານຊຽງດາ ໄດ້ເອົາເຫຼັກລົງຊຸກເຊື່ອງໄວ້ປ່າຫຍ້າແຄມທາງ ແລະ ກັບຄືນມາເອົາເຫຼັກລາງລົດໄຟອີກຈຳນວນ 8 ອັນ ແຕ່ເມື່ອມາຮອດບ່ອນທີ່ເອົາເຫຼັກຊຸກເຊື່ອງໄວ້ນັ້ນ ຈຶ່ງຖືກອຳນາດການປົກຄອງບ້ານຊຽງດາເຂົ້າກັກຕົວພ້ອມຂອງກາງ ຈຳນວນ14 ອັນ.

ຕໍ່ກັບຄະດີດັ່ງກ່າວ ສາມາດເກັບກູ້ຂອງກາງຄືນມາໄດ້ມີເຫຼັກລາງລົດໄຟ ຈໍານວນ 14 ອັນ ແລະ ຝາປົກຄອງນໍ້າ 2 ອັນ, ສ່ວນຮ້ານຮັບຊື້-ຂາຍເຫຼັກນັ້ນ ໄດ້ອອກຄໍາສັ່ງເປີດການສືບສວນ-ສອບສວນຕໍ່ພວກກ່ຽວ ເນື່ອງຈາກວ່າຮ້ານບໍ່ມີເອກະສານດໍາເນີນທຸລະກິດທີ່ຖືກຕ້ອງ ແລະ ດໍາເນີນຄະດີຕາມລະບຽບກົດໝາຍ.

Related Posts

Leave a Reply

Your email address will not be published.