ປະຊາຊົນຫຼາຍບ້ານຂອງເມືອງຜາອຸດົມໄດ້ຮັບຜົນກະທົບຈາກໄພທໍາມະຊາດ (ລົມພາຍຸພັດແຮງ)

ປະຊາຊົນຫຼາຍບ້ານຂອງເມືອງຜາອຸດົມໄດ້ຮັບຜົນກະທົບຈາກໄພທໍາມະຊາດ (ລົມພາຍຸພັດແຮງ)

ເນື່ອງຈາກການປ່ຽນແປງຂອງສະພາບດິນຟ້າອາກາດຕາມລະດູການ ຈິ່ງເຮັດໃຫ້ມີຝົນຕົກ ຟ້າຮ້ອງ ຟ້າເຫຼື້ອມ ແລະ ລົມພາຍຸພັດແຮງຢູ່ໃນຂອບເຂດທົ່ວເມືອງຜາອຸດົມ ໃນຄໍ່າຄືນ ຂອງວັນທີ 13 ຫາຕອນເຊົ້າຂອງວັນທີ 14 ກັນຍາ 2021 ຜ່ານມາເຊິ່ງເຮັດໃຫ້ບ້ານ-ເຮືອນປະຊາຊົນຫຼາຍບ້ານ

ແລະ ບັນດາພື້ນຖານໂຄງລ່າງ ຈໍານວນໜຶ່ງໄດ້ຮັບຄວາມເສຍຫາຍ.

ຕໍ່ສະພາບການດັ່ງກ່າວ ໃນວັນທີ 14 ກັນຍາ ນີ້ ທ່ານ ບຸນຈັນ ຄໍາໂພທອນ ຮອງຫົວໜ້າຫ້ອງວ່າການເມືອງ ຄະນະກໍາມະການຄຸ້ມຄອງໄພພິບັດຂັ້ນເມືອງ ແລະ ວິຊາການທີ່ກ່ຽວຂ້ອງຂອງເມືອງ ໄດ້ລົງຕິດຕາມ ກວດກາ ບັນດາບ້ານທີ່ຖືກຜົນກະທົບ ຈາກໄພທໍາມະຊາດ (ລົມພາຍຸພັດແຮງ)ທີ່ໄດ້ຮັບອິດທິພົນຈາກພາຍຸໝູນເຂດຮ້ອນ ໃນຄັ້ງນີ້ ທີມງານ ຂອງເມືອງໄດ້ລົງກວດກາ ເກັບກໍາຂໍ້ມູນຜົນເສຍຫາຍເບື້ອງຕົ້ນຂອງປະຊາຊົນໃນກຸ່ມບ້ານພູວຽງໄຊ.

ຜ່ານການກວດກາຕົວຈິງຂອງທີມງານໃນກຸ່ມບ້ານພູວຽງໄຊ ມີບ້ານໄດ້ຮັບຜົນກະທົບ ຈໍານວນ 01 ບ້ານໃນນັ້ນ, ມີເຮືອນຢູ່ອາໄສ 04 ຫຼັງຄາ, ເລົ້າເຂົ້າ 19 ຫຼັງ ແລະ ຕົ້ນໄມ້ລົ້ມທັບສາຍໄຟຟ້າຂາດໜຶ່ງຈຸດເຂດບ້ານພູວຽງ.

ພ້ອມນີ້ ວິຊາການທີ່ກ່ຽວຂ້ອງຂອງເມືອງ ຍັງໄຫ້ຮູ້ອີກວ່າ: ນອກຈາກກຸ່ມບ້ານພູວຽງໄຊແລ້ວ ຍັງມີຫຼາຍບ້ານຂອງເມືອງຜາອຸດົມ ໄດ້ຮັບຜົນກະທົບຈາກໄພທໍາມະຊາດ (ລົມພາຍຸພັດແຮງ) ດັ່ງກ້າວ.

ສ່ວນມູນຄ່າການເສຍຫາຍທາງຫ້ອງການກ່ຽວຂ້ອງຈະສັງລວມ ແລະ ລາຍງານໃຫ້ຮູ້ຕື່ມອີກ.
ໂອກາດນີ້, ທ່ານ ບຸນຈັນ ຄໍາໂພທອນ ຄະນະກໍາມະການຄຸ້ມຄອງໄພພິບັດຂັ້ນເມືອງ ໄດ້ມີຄໍາເຫັນແນະນໍາໃຫ້ ຄະນະພັກ,

ອໍານາດການປົກຄອງບ້ານ ຕະຫຼອດຮອດປະຊາຊົນບັນດາເຜົ່າ ໃຫ້ເປັນເຈົ້າການຕິດຕາມ ເຝົ້າລະວັງ ສະພາບດິນຟ້າ-ອາກາດ ໃຫ້ມີສະຕິ ລະມັດລະວັງ ແລະກຽມຄວາມພ້ອມຮອບດ້ານຕໍ່ສະພາບການດັ່ງກ່າວ ທີ່ອາດຈະເກີດຂື້ນໃນຕໍ່ໜ້າທັງນີ້,

ເພື່ອເປັນການເຝົ້າລະວັງ ແລະ ປ້ອງກັນຜົນກະທົບຈາກໄພທໍາມະຊາດ ບໍ່ໃຫ້ໄດ້ຮັບຜົນກະທົບເປັນວົງກ້ວາງ.

ຂ່າວ: ບຸນໜຽວ ຈະເລີນຜົນ

ພາບ: ໂສພາ ທິບພະວົງ ແລະ ຫ້ອງການອ້ອມຂ້າງເມືອງ

Related Posts

Leave a Reply

Your email address will not be published.