ທຸກຄົນທີ່ຕິດຕາມຂ່າວສານບ້ານເມືອງຈະຮູ້ດີວ່າ ທຸກວັນນີ້ສະຖານນະການລະຫວ່າງຢູເຄຼນກັບຣັດເຊຍແມ່ນກຳລັງເຄັ່ງຄຽດຫຼາຍ ຍັງເຈລະຈາກັນບໍ່ສຳເລັດ ເນື່ອງຈາກຂໍ້ຂັດແຍ້ງທີ່ເປັນມາຍາວນານອັນນຳໄປສູ່ການກໍ່ສົງຄາມລະຫວ່າງກັນ ເຊິ່ງຈຸດນີ້ໄດ້ເຮັດໃຫ້ສື່ມວນຊົນຈາກທົ່ວໂລກໃຫ້ຄວາມສຳຄັນເປັນພິເສດ ແລະໄດ້ສົ່ງຕົວແທນໃນສຳນັກຂ່າວເຂົ້າໄປສັງເກດການ ແລະລາຍງານຂ່າວໃຫ້ທັນເຫດ ມີທັງຢູ່ຢູເຄຼນ ແລະ ຣັດເຊຍ ແຕ່ພາຍຫຼັງມາປະກົດວ່າມີລາຍງານເກີນຈີງ ຣັດເຊຍຈັ່ງອອກກົດເຫຼັກໂດຍການປະກາດລົງໂທດສື່ທີ່ອອກຂ່າວປອມ.
ຕາມຂ່າວຈາກຕ່າງປະເທດລາຍງານວ່າ: ໃນວັນທີ 4 ມີນານີ້, ທ່ານວາລາດີເມຍ ປູຕິນ, ປະທານາທິບໍດີຣັດເຊຍ ໄດ້ລົງນາມໃນກົດໝາຍສະບັບໜຶ່ງ ໂດຍໄດ້ກຳນົດວ່າ: ຈະລົງໂທດຜູ້ກະທຳຜິດທີ່ເຜີຍແຜ່ຂ່າວປອມກ່ຽວກັບທະຫານຣັດເຊຍ, ລົງໂທດຜູ້ໃສ່ຮ້າຍປ້າຍສີກອງທັບຣັດເຊຍ ແລະລົງໂທດຜູ້ຮຽກຮ້ອງໃຫ້ປະຕິບັດການລົງໂທດຣັດເຊຍ, ເຊິ່ງໂທດສູງສຸດຈາກການກະທຳຄວາມຜິດດັ່ງກ່າວ ຈະຖືກຕັດສິນຈຳຄຸກ 3 ປີ ຫຼືຖືກປັບໃໝ 1.500.000 ຣູບ. ຖ້າວ່າຂ່າວປອມພາໃຫ້ເກີດມີຜົນກະທົບທີ່ໜັກໜ່ວງ, ຈະຖືກຕັດສິນຈຳຄຸກ 10 ຫາ 15 ປີ.
ພາຍຫຼັງກົດໝາຍດັ່ງກ່າວມີຜົນບັງຄັບໃຊ້ແລ້ວ, CNN ຂອງອາເມຣິກາໄດ້ປະກາດໃນທັນທີວ່າ: ຈະຢຸດຕິການກະຈາຍສຽງຢູ່ຣັດເຊຍ; ສຳນັກຂ່າວສານບລູມເບີກຂອງອາເມຣິກາກໍໄດ້ປະກາດວ່າ: ຈະຢຸດຕິການເກັບກຳຂ່າວຢູ່ຣັດເຊຍເປັນການຊົ່ວຄາວ. ສ່ວນ BBC ຂອງອັງກິດກໍໄດ້ອອກຖະແຫຼງການວ່າ: ຈະໃຫ້ນັກຂ່າວ ແລະພະນັກງານທີ່ກ່ຽວຂ້ອງຂອງ BBC ຢຸດຕິການປະຕິບັດວຽກງານຕ່າງໆຢູ່ຣັດເຊຍເປັນການຊົ່ວຄາວ.
ຣັດເຊຍຫາກໍໄດ້ປະກາດລົງໂທດກ່ຽວກັບຂ່າວປອມ, ສື່ມວນຊົນຝ່າຍຕາເວັນຕົກກໍພາກັນຕົກໃຈ “ໜີອອກຈາກ” ຣັດເຊຍໃນທັນທີ, ຍ້ອນສາເຫດຫຍັງ ຈຶ່ງພາໃຫ້ມີເລື່ອງແບບນີ້ເກີດຂຶ້ນ?
ສຳນັກຂ່າວສານບລູມເບີກໄດ້ປະກາດວ່າ: ຣັດເຊຍໄດ້ດັດແກ້ກົດໝາຍອາດຍາ “ໄດ້ເຮັດໃຫ້ການລາຍງານຂ່າວປົກກະຕິຢູ່ຣັດເຊຍບໍ່ສາມາດດຳເນີນຕໍ່ໄປໄດ້.” BBC ກໍໄດ້ກ່າວວ່າ: ກົດໝາຍທີ່ກ່ຽວຂ້ອງ “ຄືຊິໄດ້ຖືເອົາການລາຍງານຂ່າວທີ່ເປັນອິດສະຫຼະນັ້ນ ເປັນການກະທຳຜິດ”. ຮ້າຍແຮງໄປກວ່ານັ້ນ, ທຳນຽບຂາວຂອງອາເມຣິກາກໍໄດ້ກ່າວວ່າ: “ມີຄວາມເປັນຫ່ວງເສລີພາບໃນການປາກເວົ້າທີ່ຖືກຂົ່ມຂູ່ຢູ່ຣັດເຊຍ.”
ທີ່ຈິງແລ້ວ, ຖ້າວ່າສື່ມວນຊົນຝ່າຍຕາເວັນຕົກສາມາດລາຍງານຂ່າວຕາມຄວາມຈິງຢ່າງພາວະວິໄສ ແລະຍຸຕິທຳແລ້ວ, ກໍບໍ່ຈຳເປັນຕ້ອງຢ້ານວ່າຈະຖືກກົດໝາຍຣັດເຊຍລົງໂທດ. ການທີ່ສື່ມວນຊົນຝ່າຍຕາເວັນຕົກ“ມີຄວາມເປັນຫ່ວງເສລີພາບໃນການປາກເວົ້າຈະຖືກຂົ່ມຂູ່”ນັ້ນ ທີ່ຈິງແລ້ວເກີດຈາກຄວາມເປັນຫ່ວງໃນເລື່ອງທີ່ວ່າ: ຈະບໍ່ມີເສລີພາບໃນການເສກສັນປັ້ນແຕ່ງຂ່າວປອມໄດ້ຕາມໃຈອີກແລ້ວ.
ສື່ມວນຊົນມີຈັນຍາບັນຂອງສື່ເອງ ຖ້າລາຍງານຂ່າວຕາມຄວາມເປັນຈີງກໍ່ບໍ່ມີຫຍັງຕ້ອງເປັນຫ່ວງ ເວັ້ນເສຍແຕ່ວ່າຂໍ້ມູນທີ່ລາຍງານອາດເປັນເທັດສ່ວນຫຼາຍ ເປັນການລາຍງານທີ່ເກີນຈີງ ຫາກເປັນແບບນັ້ນກໍ່ຕ້ອງຍອມຮັບໃນຄວາມເປັນຈີງ ເພາະຣັດເຊຍຄົງບໍ່ປະກາດໄປລອຍໆຢ່າງແນ່ນອນ.
ຂ່າວຈາກ: ວິເຄາະສະຖານະການ
