ແຂວງຫລວງພະບາງອອກຄຳສັງໃຫ້ເພີ່ມທະວີເຂັ້ມງວດ

ປະຈຸບັນສະພາບການແຜ່ລະບາດຂອງພະຍາດໂຄວິດ-19 ຢູ່ນະຄອນ ຫຼວງພະບາງ ຍັງມີທ່າອ່ຽງຂະຫຍາຍຕົວເປັນວົງກ້ວາງຢູ່ໃນເຂດຊຸມຊົນ, ສະນັ້ນ, ພະນັກງານ, ທະຫານ-ຕໍາຫຼວດ ແລະ ທຸກພາກສ່ວນໃນສັງຄົມຕ້ອງເປັນເຈົ້າການປະຕິບັດບັນດາມາດຕະການຕ່າງໆຂອງຄະນະສະເພາະກິດວາງອອກ ດ້ວຍຄວາມຕື່ນຕົວ ແລະ ເຂັ້ມງວດ.

🔥 ແຂວງຫລວງພະບາງອອກຄຳສັງໃຫ້ເພີ່ມທະວີເຂັ້ມງວດໃນການເປັນແບບຢ່າງເພື່ອປ້ອງກັນ,ສະກັດກັ້ນ,ຄວບຄຸມແລະແກ້ໄຂການລະບາດຂອງພະຍາດໂຄວິດ-19 ຢູ່ນະຄອນ ຫລວງພະບາງ.

ເຈົ້ານະຄອນ ຫຼວງພະບາງ ອອກຄໍາສັ່ງ ດັ່ງນີ້:

1. ໃຫ້ເລຂາໜ່ວຍພັກ ບັນດາສຳນັກງານ-ອົງການ ທົ່ວນະຄອນ ຫຼວງພະບາງ ເພີ້ມທະວີຊີ້ນໍາໂດຍກົງໃນການສຶກສາອົບຮົມການເມືອງແນວຄິດຢ່າງເລິກເຊິ່ງໃຫ້ສະມາຊິກພັກ, ພະນັກງານ, ທະຫານ, ຕຳຫຼວດ ເປັນແບບຢ່າງໃນການປະຕິບັດມາດຕະການ ປ້ອງກັນ ແລະ ແກ້ໄຂການລະບາດພະຍາດໂຄວິດ-19 ຢ່າງເຂັ້ມງວດ ຢູ່ພາຍໃນຫ້ອງການຂອງຕົນເພື່ອຍົກສູງສະຕິ ແລະ ຄວາມເປັນແບບຢ່າງ..

2. ຫ້າມພະນັກງານ, ທະຫານ, ຕຳຫຼວດ ທົ່ວນະຄອນ ຫຼວງພະບາງ ຈັດກິດຈະກຳສ້າງສັນ-ຊຸມແຊວສິ່ງມຶນເມົາ ຕາມສະຖານທີ່ ຕ່າງໆ ຢ່າງເດັດຂາດ ເຊັ່ນ: ສຳນັກງານ-ອົງການ ຮ້ານອາຫານ, ສວນອາຫານແຄມນໍ້າ, ຮ້ານປີ້ງເປັດ, ປີ້ງແບ້, ສະຖານທີ່ ທ່ອງທ່ຽວ ແລະ ສະຖານທີ່ສາທາລະນະຕ່າງໆ.

3. ບັນດາສໍານັກງານ-ອົງການ ຕ້ອງມີມາດຕະການປ້ອງກັນພະຍາດໂຄວິດ-19 ເຊັ່ນ: ຕັ້ງຈຸດວາງແຈວລ້າງມື, ພະນັກ ງານແລະ ຜູ້ທີ່ມາພົວພັນວຽກ ຕ້ອງໃສ່ຜ້າອັດປາກ-ອັດດັງ ທຸກຄັ້ງ ພ້ອມທັງຮັກສາໄລຍະຫ່າງ.

4. ມາດຕະການຕໍ່ພະນັກງານທີ່ລະເມີດໃນການຈັດກິດຈະກຳສ້າງສັນ-ຊຸມແຊວ ມອບໃຫ້ເລຂາໜ່ວຍພັກສຳນັກງານ-ອົງການເປັນເຈົ້າການສຶກສາອົບຮົມ-ສໍາຫຼວດກວດກາ, ຖ້າຍັງຝ່າຝືນແມ່ນໃຫ້ປະຕິບັດວິໄນຕາມສະຖານໜັກ ຫຼື ເບົາ.

5. ກໍລະນີພະນັກງານຜູ້ໃດທີ່ໄດ້ພົວພັນກັບຜູ້ຕິດເຊື້ອ ຫຼື ກຸ່ມສ່ຽງ ຕ້ອງໂຈະປະຈໍາການຊົ່ວຄາວ ແລະ ຮີບຮ້ອນລາຍງານຕົວກັບ ຄະນະສະເພາະກິດ ເພື່ອກວດຫາເຊື້ອ ພ້ອມທັງ ຈຳກັດບໍລິເວນຢູ່ສູນໃຫ້ທັນເວລາ. ຖ້າຫາກຍັງເຄື່ອນໄຫວທາງສັງຄົມທີ່ພາໃຫ້ເກີດການແຜ່ເຊື້ອເປັນວົງກ້ວາງ ແມ່ນຈະຖືກປັບໃໝ ແລະ ດຳເນີນຄະດີຕາມລະບຽບກົດໝາຍ.

6. ຄຳສັ່ງສະບັບນີ້ມີຜົນບັງຄັບໃຊ້ນັບແຕ່ວັນລົງລາຍເຊັນເປັນຕົ້ນໄປຈົນກ່ວາຈະມີການປ່ຽນແປງ.

Related Posts

Leave a Reply

Your email address will not be published.