ສຸດຍອດ ແລະ ຂໍສະແດງຄວາມຍິນດີ ກັບເມືອງວຽງໄຊ ແຂວງຫົວພັນ

ສຸດຍອດ ແລະ ຂໍສະແດງຄວາມຍິນດີ ກັບເມືອງວຽງໄຊ ແຂວງຫົວພັນ

👏 ຖືເປັນຄວາມພາກພູມໃຈເປັນຢ່າງຍິ່ງ ສໍາລັບປະຊາຊົນບັນດາເຜົ່າພາຍໃນເມືອງວຽງໄຊ ກໍຄື ປະຊາຊົນແຂວງຫົວພັນ

ຖານທີ່ໝັ້ນຂອງການປະຕິວັດລາວ ພາຍຫລັງຄອງຄອຍມາເປັນເວລາ 2 ປີກວ່າ, ເມື່ອ ເມືອງວຽງໄຊ ໄດ້ຮັບລາງ ວັນມາດຕະຖານເມືອງທ່ອງທ່ຽວສະອາດອາຊຽນ

(Asean Clean Tourist City Standard 2022 – 2024) ໂດຍໄດ້ຮັບການປະກາດຢ່າງເປັນທາງການໃນງານມະຫາກໍາການທ່ອງທ່ຽວອາຊຽນ ປະຈຳປີ 2022 ຈັດຂຶ້ນເມື່ອບໍ່ດົນມານີ້, ທີ່ແຂວງສີຫານຸກ,

ປະເທດກໍາປູເຈຍ. ເຊີ່ງ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ຈະຮ່ວມກັບພາກ ສ່ວນກ່ຽວຂ້ອງຂອງແຂວງຫົວພັນ ຈັດມອບ-ຮັບລາງວັນທີ່ມີຄວາມໝາຍສໍາຄັນດັ່ງກ່າວໃຫ້ອົງການປົກຄອງ ເມືອງວຽງໄຊ ໃນວັນທີ 17 ກຸມພາ 2022 ນີ້, ທີ່ຖໍ້າຊ້າງລອດ ພາຍໃນເມືອງດັ່ງກ່າວ.

​ທ່ານ ສິງວົງໄຊ ສຸລິວົງພັນ, ປະທານກວດກາພັກ-ລັດເມືອງວຽງໄຊ ໃຫ້ສໍາພາດວ່າ: ພາຍຫລັງໄດ້ຮັບຮອງເອົາແຜນການສ້າງເມືອງວຽງໄຊ ເປັນເມືອງທ່ອງທ່ຽວສະອາດອາຊຽນ,

ອົງການປົກຄອງເມືອງ ໄດ້ແຕ່ງຕັ້ງຄະນະຮັບຜິດ ຊອບເພື່ອລົງເຄື່ອນໄຫວຮ່ວມກັບອົງການປົກຄອງບ້ານ ນໍາພາພະນັກງານ ແລະ ປະຊາຊົນຢູ່ບັນດາບ້ານພາຍໃນເທດ ສະບານເມືອງ ປະຕິບັດໃຫ້ໄດ້ຕາມເງື່ອນໄຂທີ່ກໍານົດ ເປັນຕົ້ນ:

ການຄຸ້ມຄອງສິ່ງແວດລ້ອມ, ປູກຕົ້ນໄມ້, ດອກໄມ້, ພື້ນທີ່ສີຂຽວ, ການຈັດການສິ່ງເສດເຫລືອ, ການຮັກສາຄວາມສະອາດ ແລະ ຕົບແຕ່ດອກໄມ້ຕາມແຄມທາງ ແລະ ອື່ນໆ ຈົນມາຮອດທ້າຍປີ 2021 ຈິ່ງສະເໜີພາກສ່ວນກ່ຽວຂ້ອງຂອງແຂວງ ແລະ ສູນກາງໄປປະເມີນຕາມເງື່ອນໄຂ 7 ຕົວຊີ້ວັດຕົ້ນຕໍ, 28 ຕົວຊີ້ວັດຍ່ອຍ, ລວມທັງໝົດຫລາຍກວ່າ 100 ເງື່ອນໄຂ, ເປັນຄັ້ງທີ 2 ເຫັນວ່າບັນລຸຫລາຍກວ່າ 80% ຂອງບັນດາຕົວຊີ້ວັດ ຈິ່ງເຮັດໃຫ້ເມືອງວຽງໄຊ ໄດ້ຮັບລາງວັນມາດຕະຖານເມືອງທ່ອງທ່ຽວສະອາດອາຊຽນ.

​ທ່ານ ສິງວົງໄຊ ສຸລິວົງພັນ ໃຫ້ຮູ້ຕື່ມວ່າ: ການໄດ້ຮັບລາງວັນທີ່ຊົງກຽດໃນຄັ້ງນີ້ ຖືເປັນຄວາມພາກພູມໃຈທີ່ສຸດ ເພາະເປັນໃບໜ້າໃບຕາໃໝ່ໃຫ້ທີ່ຊາວເມືອງວຽງໄຊ ທີ່ຍາດມາໄດ້.

ສະນັ້ນ ເພື່ອສືບຕໍ່ໃຫ້ຮັກສານາມມະຍົດນີ້ໃຫ້ຍືນຍົງຄົງຢູ່ຕະຫລອດໄປ, ອົງການປົກຄອງເມືອງ ແລະ ປະຊາຊົນຊາວເມືອງວຽງໄຊ ຈະສືບຕໍ່ປັບປຸງສິ່ງທີ່ຍັງຄົງຄ້າງໃຫ້ດີຂຶ້ນກວ່າເກົ່າ ເປັນຕົ້ນ: ການປັບປຸງສະໜາມເກັບມ້ຽນຂີ້ເຫຍື້ອ, ບ່ອນບໍາບັດນໍ້າເບື້ອງ, ປັບປຸງຖະໜົນຫົນທາງໃຫ້ດີກວ່າເກົ່າເພື່ອໃຫ້ສວຍງາມ ແລະ ເໝາະແກ່ການຍ່າງຫລີ້ນ, ສືບຕໍ່ປຸກລະດົມປະຊາຊົນພາຍໃນເທດສະບານເມືອງເຮັດ

ອະນາໄມໃຫ້ເປັນກິດຈະວັດປະຈໍາວັດ ແລະ ບາງວຽກງານຈໍານວນໜຶ່ງ ເພື່ອແນໃສ່ເຮັດໃຫ້ເມືອງວຽງໄຊ ນັບມື້ມີຄວາມສະອາດງາມຕາ ແລະ ຂຽວງາມໄປດ້ວຍປ່າໄມ້ທໍາມະຊາດ ກາຍເປັນຈຸດດຶງດູດໃຈໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າໄປທ່ອງທ່ຽວເມືອງວຽງໄຊ ໃຫ້ນັບມື້ຫລາຍຂຶ້ນໃນຕໍ່ໜ້າ.

FM 90 ລາຍງານ

Related Posts

Leave a Reply

Your email address will not be published.