ແຈ້ງດ່ວນ‼️ແນວລາວສ້າງຊາດ

??ແຈ້ງດ່ວນ‼️ແນວລາວສ້າງຊາດ ຫ້າມນະຄອນຫຼວງວຽງຈັນ ຈັດງານບຸນຫໍ່ເຂົ້າປະດັບດິນ ວັນທີ 6 ກັນຍານີ້.

ວັນທີ 3 ກັນຍາ 2021 ຜ່ານມາ ແນວລາວສ້າງຊາດ ນະຄອນຫຼວງວຽງຈັນ (ນວ) ອອກແຈ້ງການເຖິງແນວລາວສ້າງຊາດ 9 ຕົວເມືອງ ທົ່ວ ນວ ຫ້າມຈັດງານບຸນປະເພນີ (ບຸນຫໍ່ເຂົ້າປະດັບດິນ) ໃນວັນທີ 6 ກັນຍາ 2021 ຢູ່ຕາມວັດຕ່າງໆໃນຂອບເຂດ ທົ່ວ ນວ, ອີງໃສ່ສະພາບການລະບາດ ຂອງພະຍາດໂຄວິດ-19 ຢູ່ພາຍໃນ ນວ ເຫັນວ່າ ຍັງມີກໍລະນີຜູ້ຕິດເຊື້ອໃນຊຸມຊົນ ຊຶ່ງອາດຈະມີຄວາມສ່ຽງສູງ ທີ່ຈະມີການແຜ່ລະບາດໃນຊຸມຊົນ ອອກເປັນວົງກວ້າງ; ເພື່ອເປັນການເພີ່ມທະວີການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ; ພ້ອມທັງເປັນການຫຼຸດຜ່ອນຄວາມສ່ຽງ ທີ່ອາດຈະເກີດຂຶ້ນ ຕໍ່ສຸຂະພາບ ແລະ ຊີວິດຂອງປະຊາຊົນບັນດາເຜົ່າ ໃນທົ່ວ ນວ; ແນວລາວສ້າງຊາດ ນວ ແຈ້ງມາຍັງ ແນວລາວສ້າງຊາດ 9 ຕົວເມືອງ, ແນວລາວສ້າງຊາດບ້ານ ແລະ ປະຊາຊົນບັນດາເຜົ່າ ທົ່ວ ນວ ໃຫ້ປະຕິບັດຄື:

1. ໃຫ້ເອົາໃຈໃສ່ຈັດຕັ້ງປະຕິບັດ ຄຳສັ່ງຂອງເຈົ້າຄອງ ນວ, ສະບັບເລກທີ 015/ ຈນວ, ລົງວັນທີ 30 ສິງຫາ 2021, ວ່າດ້ວຍການເພີ່ມທະວີ ການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຢູ່ ນວ ຢ່າງເຂັ້ມງວດ.2. ຫ້າມຈັດງານບຸນປະເພນີ (ບຸນຫໍ່ເຂົ້າປະດັບດິນ) ໃນວັນທີ 06 ກັນຍາ 2021 ຢູ່ຕາມວັດຕ່າງໆ ໃນຂອບເຂດ ທົ່ວ ນວ (ອະນຸຍາດໃຫ້ພຣະສົງ ປະຕິບັດກິດຈະວັດ ຂອງພຣະສົງພາຍໃນຂອບເຂດວັດຂອງຕົນ).

3. ມອບໃຫ້ແນວລາວສ້າງຊາດ 9 ຕົວເມືອງ, ແນວລາວສ້າງຊາດບ້ານ ສົມທົບກັບອົງການປົກຄອງເມືອງບ້ານ ແລະ ການຈັດຕັ້ງກ່ຽວຂ້ອງ ແລະ ພໍ່ແມ່ປະຊາຊົນບັນດາເຜົ່າ ທົ່ວ ນວ ຫ້າມຈັດກິດຈະກຳທາງສາສະໜາ ຢູ່ວັດໃນມື້ບຸນດັ່ງກ່າວ ຢ່າງເດັດຂາດ.

4. ມອບໃຫ້ແນວລາວສ້າງຊາດ 9 ຕົວເມືອງ, ແນວລາວສ້າງຊາດບ້ານ ສົມທົບກັບເຈົ້າໜ້າທີ່ປ້ອງກັນຄວາມສະຫງົບຂັ້ນເມືອງ, ຂັ້ນບ້ານ ແລະ ການຈັດຕັ້ງກ່ຽວຂ້ອງ ທຸກພາກສ່ວນ ເປັນເຈົ້າການເຄື່ອນໄຫວ ຕິດຕາມ, ກວດກາ, ຖ້າພົບເຫັນມີການລະເມີດໃນການຈັດງານບຸນ ໃຫ້ເຈົ້າໜ້າທີ່ປະຕິບັດຕາມຄຳສັ່ງເລກທີ015/ຈນວ ຢ່າງເຂັ້ມງວດ ແລະ ແຈ້ງມາຍັງບັນດາທ່ານ ພ້ອມກັນຈັດຕັ້ງປະຕິບັດ ຕາມເນື້ອໃນແຈ້ງການສະບັບນີ້.