🦠 ໂອໄມຄຣອນ ເພີ່ມຈຳນວນໃນລະບົບທາງເດີນຫາຍໃຈໄວກວ່າເດວຕ້າ 70 ເທົ່າ !!!

🦠 ໂອໄມຄຣອນ ເພີ່ມຈຳນວນໃນລະບົບທາງເດີນຫາຍໃຈໄວກວ່າເດວຕ້າ 70 ເທົ່າ !!!

ຂ່າວຕ່າງປະເທດລາຍງານໃນວັນທີ 20 ທັນວາ: ທີມນັກວິໄຈຂອງຄະນະແພດສາດ ມະຫາວິທະຍາໄລຮົງກົງ ໄດ້ເປີດເຜີຍຜົນການວິໄຈຄັ້ງຫຼ້າສຸດວ່າ ເຊື້ອໄວຣັສກາຍພັນໂອໄມຄຣອນ ສາມາດເພີ່ມຈຳນວນເຊື້ອ (Replication) ໃນລະບົບທາງເດີນຫາຍໃຈໄວກວ່າເດວຕ້າເຖິງ 70 ເທົ່າ ແຕ່ໂອກາດຕິດເຊື້ອໃນປອດທີ່ຮຸນແຮງໜ້ອຍກວ່າເດວຕ້າ.

ດຣ. ໄມເຄີລ ຊານ ຊີ-ເຫວີຍ ໜຶ່ງໃນທີມວິໄຈ ເປີດເຜີຍວ່າ: ພຽງ 24 ຊົ່ວໂມງຫຼັງຈາກໄດ້ຮັບເຊື້ອໄວຣັສໂອໄມຄຣອນ ສາມາດເພີ່ມຈຳນວນໃນຫຼອດລົມທີ່ເຊື່ອມຕໍ່ກັບປອດໄດ້ໄວກວ່າເດວຕ້າເຖິງ 70 ເທົ່າ ແຕ່ເພີ່ມຈຳນວນໃນເນື້ອເຍື່ອປອດໄດ້ຊ້າກວ່າເດວຕ້າ 10 ເທົ່າ.

ຜົນການຄົ້ນຄ້ວາລະບຸວ່າ: ການທີ່ໄວຣັສໂອໄມຄຣອນສາມາດເພີ່ມຈຳນວນໃນລະບົບທາງເດີນຫາຍໃຈໄວກວ່ານັ້ນ ອາດນຳໄປສູ່ການອະທິບາຍໄດ້ວ່າ ເພາະເຫດໃດໄວຣັສສາຍພັນນີ້ ຈຶ່ງແຜ່ລະບາດໄວກວ່າສາຍພັນອື່ນໆ ທີ່ພົບກ່ອນໜ້ານີ້, ແຕ່ການຕິດເຊື້ອໃນປອດທີ່ມີລະດັບຕ່ຳກວ່ານັ້ນ ອາດບົ່ງຊີ້ວ່າ ໂອໄມຄຣອນ ອາດກໍ່ໃຫ້ເກີດອາການຮຸນແຮງໜ້ອຍກວ່າ.

ດຣ. ຊານ ຊີ-ເຫວີຍ ອະທິບາຍວ່າ: ມີຄວາມຈຳເປັນຢ່າງຍິ່ງທີ່ເຮົາຕ້ອງຊາບວ່າ ຄວາມຮຸນແຮງຂອງພະຍາດໃນມະນຸດນັ້ນ ບໍ່ໄດ້ກຳນົດດ້ວຍການເພີ່ມຈຳນວນຂອງເຊື້ອໄວຣັສເທົ່ານັ້ນ ແຕ່ຍັງຖືກກຳນົດໂດຍການຕອບສະໜອງຂອງພູມຄຸ້ມກັນຂອງຜູ້ຕິດເຊື້ອ.

ພ້ອມທັງລະບຸວ່າ ໄວຣັສທີ່ມີການແຜ່ລະບາດສູງຢ່າງໂອໄມຄຣອນນັ້ນ ອາດເປັນສາເຫດຂອງພະຍາດທີ່ມີອາການຮຸນແຮງ ແລະ ເສຍຊີວິດ ເນື່ອງຈາກມີການແຜ່ລະບາດຢ່າງໄວວາ ເຖິງແມ່ນວ່າ ການຕິດເຊື້ອໃນປອດບໍ່ຮຸນແຮງກໍຕາມ.

ແນວໃດກໍຕາມ ຜົນວິໄຈດັ່ງກ່າວ ຍັງຢູ່ໃນຂັ້ນຕອນການທົບທວນຈາກສະຖາບັນອື່ນໆ ຊຶ່ງຕາມທຳນຽມປະຕິບັດແລ້ວ ນັກວິໄຈສາມາດເຜີຍແຜ່ກ່ອນການທົບທວນຈາກສະຖາບັນອື່ນໆເນື່ອງຈາກວ່າ ພະຍາດລະບາດຖືວ່າ ເປັນກໍລະນີເລັ່ງດ່ວນ.

ປະຊາຊົນ

Related Posts

Leave a Reply

Your email address will not be published. Required fields are marked *